خالد قيرمان -
استوقفتني عجوز برجعتي من العمل قالت لي؛ أمانة ياحج أيحين أول رجب؟.. فأجبتها مداعبا؛ قل اعوذ برب الفلق قولي يارجال ياخي مش ياحج قد انتي جدتي هههه فكان ردها؛ انا ما عدنيش جاهل يالله بحسن الختام.. قلت؛ خيرة الله أول يوم عيقع الربوع ليش بتسألي؟ قالت؛ اشتي اصوم.. قلت مش ضروري مشو واجب. قالت؛ الا أنت داري ان رجب مبروك كان الأولين يسموه رجب وجبجب وشهر العجب. قلت؛ يعني أيش؟ قالت مدري قلي أنت هوذا انت باين عليك متعلم؟.. ثم واصلت كلامها قائلة؛ كنا في البلاد ليلة جمعة رجب ننصر في الجبال وكل قرية تنصر من صليها كان يخلوا الجبال مسرجة واحدة.. قلت؛ ايش يعني تنصر؟ قالت؛ كنا نجهز من اليوم القدمي خلبة معجونة رماد ولفالف من حق البقر وشوية تراب ونجلس نرشرشها تتخمر وبعدين نجلعمها جلاعم جلاعم. قاطعتها قائلا ؛ أيش معنى جلاعم ؟ قالت؛ إنا منك صدق مشنت داري؟ يعني نكومهن ساع الكرات ونطلعهن الجبال ونسقيهن بقاز ونعلق وهي تطلع لهبة ساع اينه تجلس لاصية لااا ثاني يوم والناس تخرج الأجران.. فقاطعتها قائلا؛ أيش من اجران؟ قالت بسخرية أه منك صورتك" ازبيك" الجرن الجرن مشنت داري ماهو الجرن الذي بيدقعوا فيه الثمرة الحب البر والذرة فهمت؟ قلت؛ ايوه فهمت وبعدين؟ قالت؛ وبعدا يتسامروا والأندار يمثلوا. قلت؛ ايش من اندار؟ قالت؛ الندر الذي يضحك الناس بكلامه ويعنص بمشيته مثل النسوان يمثل يمثل ساع حق هذ الأيام. قلت؛ هااااه فهمت.
هيا اسمعيني ياجدة قسطي يا حجة وابردي لش من قولتش رجب وجبجب وشهر العجب ومشنتي داريه ما معناها.. شهر رجب سمي بالشهر الأحب يصب الله فيه الرزق صب فقد كان صحابة الرسول صل الله عليه وآله وسلم يجدون الخير والرحمة والرزق الوفير في هذا الشهر وكان المريض يشفى بفضل الإكثار من الدعاء في هذا الشهر ففيه من البركات الكثير فهمتي؟
قالت؛ اللهم بارك لنا في رجب وشعبان وبلغنا رمضان..
قلت هوذا انتي دارية احسن مني على أبوش رحمة الله.