خالد قيرمان -
اتصلي قبل أسبوع صاحبي وزميلي في العمل قال لي بدلزته المعتاده: تعال إقبل اتحرك غداء. قلت : ايش من غداء؟ وما المناسبه انا اعرفك جلده من اين جاء الكرم هذا؟ رد علي : معانا عرس جارنا المغترب في امريكا واحد شليته سبحان مقسم الارزاق مشو داري ما يفعل ركن علي اجهز الوليمه ذبحنا عجلين ساع اينه وادينا طباخ يسبك الدنيا اللحم الحنيذ والمندي والدقة والشفوت وبنت الصحن والسمن والعسل المهم إقبل إقبل قد الساعه 11 الحق البس مايجي ظهر الا وانت عندي. قلت : انا بطل الخجافه حقك اسير عند ناس معرفهمش او مابش ما اكل؟ الله يسامحك. قال : قلنا لك هو ما يعرفش احد طول عمره مغترب في أمريكا وجاء يتزوج ويرجع عاده اشترى الفلة قبل شهرين والمعازيم كلهم احنا حلفنا عليهم محد من طرف الحريو إلا أهله والجيران هانا محد يعرف احد كل واحد في فلته ومعظمهم مغتربين في أمريكا يعني المعازيم قليل والخير خيرات.. انت داري ان به قات عيدان من هانا هه مالك إلا بحشامه ما قالت شيء قلت : ناهي ناهي شابسر اذا قدرت اجي قضك ماشي النابي الغفله. قال:ماشي ماشي حرام ما حيل ما تجي خليني انغنغك اليوم قد اسمك بتعتبرني جلده اليوم عتبسر الكرم الحاتمي .. قلت في نفسي : من حق امك ياجلده ههههه.
المهم وهو بيرثي مابلا وإلا اجي كنت في الشارع باب البيت ولمحت جارنا خارجي بالسيارة قلت للمتصل : خلاص خلاص عداجي غلق التلفون مع السلامة .
اشرت لجارنا قلت له هه هه الين؟ قال : اسير اتغدا واشتري علاقيه قات. قلت : والمره والجهال اينهم؟ قال : في البلاد ساروا يعيدوا قلت : من ذلحين؟ قال : مانفعل قد اسمها نفخه.
المهم طلعت جنبه وحنينا قد كنت لابس جاهز وفي الطريق قال : جي، نتغدا عند الحرازي بدل المشوار لااااااخر الدنيا والطريق هذا الساع زحمة وعلى حسابي هيا ماعد تشتي؟ قلت : انا داري انك مزلط اكيد استلمت المرتب قال : الحمد والشكر لله المرتب والبدلات وزيد فوقهن ارباح الأسهم السنوية.. قلت من باب الفضول : يعني عدعيد مه؟ كم استلمت؟ قال : حوالي مليون و300 الف . قلت : ماهو ماهو مليون و300 كل شهر ؟ قال ماشي ماشي مابلا هذاء الشهر في العادة المرتب مع المزايا الشهرية بتوصل لامليون 900 الف هكذا هه الحمد والشكر لله. وانت كم بتستلم في الاعلام ؟ قلت بين استلم زمج واربع بيض.. بعدما صمنا عشر سنوات بين استلم نص راتب كل شهر وعاده انتظم من بداية السنة هذه هو ذاانت داري قد سمعوا بناء امة لااله الا الله. قال : وكم المعاش؟ قلت اسكت اسكت اسألك بالله لاعد تحمضهاش اسكه ابسر لي عمل حارس وإلا فراش عندكم؟ افعل خير في صاحبك؟ قال : ماهو بعد ماشيب قري وبعدا قد زانت اين كان انت راقد ؟ قلت : وانت امانة مادهدهك لهذا العمل؟ قال : البركة في الوالد الله يرحمه لساني جنبه وعادنا في الثانوية ودخلت الجامعة والشهادة دعمت. قلت : طيب والأسهم من عهد الوالد؟ ايش كان معاكم ورث وشغلتوه؟ رد ضاحكا : مالك مالك اخجف هذك الأيام الموظفين باسلوا بمكافأة شهرية واشتروا بها اسهم وبعضهم اتسلفوا من ظهر الراتب من صابره لط له وسبرت ومن يومها ارباح سنويه تقارب الـ50% من قيمة الاسهم.
وفجأه واحنا في جولة الاربعين نبع لاعرضنا متر مكور باقصى سرعة مسك بريك وطحص ولاعرض الباب فطسه لاداخل لوما افتتح هو غر سلم الله كان الزجاج مرفوع والا كان عيهره، نزلنا من فوق السيارة قلنا مالك ياجني ما تحاسب تمشي دلا ليش مكور هكذا ؟ قال : كله عمل الراكب مكني اسرع اسرع الحق العنسي المقوت عيكمل اهرمني في روحي ما افعل؟ قال صاحبي ما تفعل هيا صلح السيارة رد صاحب المتر والله ما اجد في جيبي غير 1500 ريال وحق ذيه المشوار 500 حق غدا للجهال فتشني ومالقيت لك. رد صاحبي : مش وقت الخبيرات هذه سمكر السيارة إن شاء الله ترهن المتر ماافعلك .
تدخل المحوشين وقالوا ما شاء الله كان والحمدلله على السلامة سامحه والباري عيعوضك بجاه الله خليه يرحله يشقى على عياله باين عليه يرحم بكي السواق وصاحبنا رحمه وقال الحجة عند المرور مابش ضابطي خلاص رحلك حسبنا الله ونعم الوكيل .
ابسر صليا بلؤم وقال هيا ارجع وراء ازقم الباب نسير نبسر سمكري.
قلت : والغداء؟ رد علي : القاوق القاوق بتبسر الباب او ماشي؟ فما كان مني إلا ان سكت ولا نخس مشينا لاقرب ورشة سمكرة وشفنا بابها قاطرة محملة طابقين سيارات مدحملة.. دخلنا لاحوش الورشة قلنا للمهندس يامنعاه جي ابسر لنا الباب ؟ قال : عفوا احنا مشغولين.. قلت له لو سمحت انقذنا نمشي ؟ قال : مقدرش مقدرش صاحب الورشة مايصلح الا سياراته المستوردة ابسر القاطرة قبالك؟ قلت : كيف؟ رد واحد كان واقف جنبنا :يااخي افهم التاجر المستورد لهذه القمامة من السيارات هو صاحب الورشة وهو صاحب التشليح وهو صاحب المعرض فهمت قصدي؟ رد صاحبي : لا مافهمتش ولا اشتي افهم . كان لوسمحت عيرني تيه الخشبة وتيه المطرقة.
ابسر صليا وقال هيا اخلس الكوت وشمر افتح الخانة وادي العده.
قلت حاضر. فكينا ديكور الباب من الداخل وجرينا قطعة الخشب ودقينا بها العبصة لما رجعت مكانها ولكن بعدما اهتر الرنج واتشوه الباب من كثر الدلبجة.
رجعت كل شيء مكانه ورجعنا طريق الحارة اسكته ولانخس وصل لاباب بيتي نزلني وقد الساعة ثلاث عصر.
اتصل صاحبي يلومني ليش ماجيتش اتغدا رديت عليه : القاوق القاوق.
المهم لاعد تغدينا ولاسلمنا القهر والشقى اعوذ بالله من زارت يوم.